जूलै महिन्यामधे ज्वारीवर खोड माशीचा प्रादुर्भाव होण्याची शक्यता असते. तरी शेतकरी बंधुनी शेताचे नियमित सर्वेक्षण करून प्रादुर्भाव आढळून आल्यास या किडीचा बंदोबस्त करावा.
किडीची माशी फिकट पिवळसर असते व आकाराने घरातील माशी पेक्षा लहान असते. मादी माशी पानावर खालचे बाजुस सुक्ष्म लांबट पांढरे अंडे घालते. अंड्यातून 2-3 दिवसात अळी बाहेर पडते व नंतर पोंग्यात प्रवेश करते.
अळी पोंग्यात शिरून आतील गाभा पोखरून टाकते. त्यामुळे रोपाचा पोंगा सुकून जातो. त्याला 'मर' असे म्हणतात. असे पोंगे सहजपणे उपसून येतात. पोंग्याचा खालील भाग सडलेला असतो व त्याचा घाण वास येतो.
या माशीचे व्यवस्थापन करण्यासाठी काही उपाय पुढीलप्रमाणे आहेत.
- पिक काढणी नंतर नांगरटी करून धसकटे जाळुन टाकावीत.
- खोड माशीचा प्रादुर्भाव टाळण्यासाठी ज्वारीची लागवड 7 जुलैच्या अगोदर करावी.
- पेरताना बियाण्यास इमिडाक्लोप्रीड 45 टक्के एफएस 12 मिली किंवा थायामीथोक्झाम 30 टक्के एफएस 10 मिली प्रती किलो बियाण्यास लावावे
किंवा
- पेरणीच्या वेळेस फोरेट 10 टक्के दाणेदार / 18.75 किलो किंवा कार्बोफ्युरॉन 3 टक्के सीजी 33.30 किलो प्रती हेक्टर जमिनीतून द्यावे.
- ज्वारीच्या लागवडीला उशीर झाल्यास बियाण्यांचे प्रमाण जास्त वापरावे.
- शिफारशीत नत्र खताचा वापर करावा
- ज्वारीचे पीक दाटू देवू नये.
- किडग्रस्त झाडे उपटून कादुन त्यातील अळ्या नष्ट कराव्यात.
- तसेच क्लीनॉलफॉस 25 टक्के ईसी 15 ते 30 मिली किंवा मिथिल डेमेटॉन 25 टक्के ईसी 20 मिली 10 लीटर पाण्यात मिसळून फवारणी करावी.